Karsten Hansen sett arbeiðsbólk at orða nýggja diabetesheildarætlan fyri Føroyar

Ætlanin við eini nýggjari diabetesheildarætlan er serliga at leggja herðslu á fyribyrging, so tey, ið hava fingið staðfest týpu 2 diabetes kunnu hava eitt so gott lív við sjúkuni, sum til ber

Stórar samfelagsbroytingar í londunum kring okkum hava havt við sær broyttar vanar bæði innan kost og rørslu, sum í stóran mun hava ávirkað heilsuna hjá borgarunum. Hesar broytingar síggjast eisini aftur her heima í Føroyum, har talið á teimum er nógv vaksandi, ið fáa kroniskar sjúkur, millum aðrar sjúkur týpu 2 diabetes.

Landsstýrismaðurin í heilsumálum, Karsten Hansen, hevur gjørt av, at nýggj diabetesheildarætlan verður gjørd fyri Føroyar. Í hesum sambandi hevur hann sett ein arbeiðsbólk og ein fylgibólk at mynda ætlanina. Í viðmerking sigur landsstýrismaðurin:

- Tíðin er nú búgvin til, at ein nýggj diabetesheildarætlan verður skrivað fyri Føroyar. Verandi diabetesheildarætlan frá 2003 var eitt gjøgnumbrot fyri diabetessjúklingar við tað, at leiðreglur vórðu settar innan diabetessjúkuna í Føroyum.

Landsstýrismaðurin hevur ta áskoðan, at arbeitt eigur at verða miðvíst við eini tilgongd, har fólk við kroniskum sjúkum so sum diabetes týpu 2 verða lærd upp í eginumsorgan - Self Care. Hesi eiga at fáa møguleika fyri at læra at taka ábyrgd av egnari heilsu.

Ætlanin við eini nýggjari diabetesheildarætlan er serliga at leggja herðslu á fyribyrging, so tey, ið hava fingið staðfest týpu 2 diabetes kunnu hava eitt so gott lív við sjúkuni, sum til ber. Serliga verður hugsað um at byrgja uppfyri, at fólk við týpu 2 diabetes fáa fylgisjúkur. Tí verður dentur lagdur á, at kunnað verður um týdningin av røttum kosti, støðugari rørslu og harvið trivnað í gerandisdegnum.

Í arbeiðsbólkinum sita:

• Kristiana Rein, umboðandi Diabetesfelag Føroya
• Jens Andreasen, umboðandi diabetessjúklingar
• Dánjal Petur Højgaard, umboðandi Læknafelag Føroya
• Steen Larsen, umboðandi Kommunulæknafelag Føroya
• Durid Johannesen, umboðandi diabetesambulatoriið, Klaksvíkar Sjúkrahús
• May-Britt S. Jacobsen, umboðandi Sjúkrarøktarfrøðiskúli Føroya
• Mariann Patursson, umboðandi kostráðgeving, Landssjúkrahúsið
• Kristianna Larsen á Lofti, samskipari, Heilsumálaráðið

Mynd:
Arbeiðsbólkurin saman við Karsten Hansen, landsstýrismanni: Kristiana Rein, Durid Johannesen, May-Britt S. Jacobsen, Mariann Patursson, Jens Andreasen, Dánjal Petur Højgaard, Kristianna L. á Lofti (Steen Larsen vantar á myndini).